Hulanda...here we come!

Promoshon ta sigui na Hulanda!

Pa un proyekto di tal peso manera ‘Kòrsou Inspirativo Tòp 100’ tin éksito, bo mester di un ekipo ku bo por konta kuné. Ku gran orguyo nos por bisa ku nos tabatin un tim fantástiko na Kòrsou, ku a sòru pa tur kos kana sublime.

Ta p’esei nos kier yama un danki masha speshal na tur e personanan ku di un òf otro forma a kontribuí na e proyekto aki. Danki na Tommy, Martha, Yessy, Evita, Farina, Raisa, Gregory, Shuraisy, Joan, Gilbert, Paul, Coraline, Jules i Ewald. Nos modelonan Aisha i Maikel. Un danki speshal ta bai na Extra Productions i su tim di distribushon, na Claudio pa e diseño gráfiko, na Chris i su tim di Interpress pa e trabounan di imprentashon. I por último danki na direktiva di fundashon Fudsek, kendenan ta Chia, Frank, Sonja i Morris pa e konfiansa ku nan a depositá den nos organisashon.

Awor nos ta sigui ku e promoshon na Hulanda, kaminda e di dos parti di nos pueblo ta biba. Esnan ku no a nominá òf vota pa nan faborito ainda, por hasi esaki te ku fin di augustus próksimo. Sòru pa huntu ku bo motivashon bo manda un portrèt di e persona ku ta inspirá bo. Buska un hende ku por yuda bo pone tur e informashonnan aki mesora riba nos wèpsait, pasobra nos no ta tuma esakinan por eskrito mas.