Kòrsou Inspirativo Tòp 100

Tur hende lo por nominá su hérue Yu di Kòrsou ku e ta haña ta esun mas inspirativo òf vota pa un ku a ser nominá kaba. Bo hérue inspirador por ta di tur gremio: un gran kòki, un dòkter, un trahadó sosial, eskritor, sientífiko, kantante, pastor, deportista, arkitekto, dosente, músiko, etcetera.

Introdukshon
Tur komunidat eksitoso na mundu a pasa un proseso –talbes inkonsiente- di madures. Nan a logra un desaroyo sosial positivo a base di un mentalidat fuerte, un bon gobernashon i un infrastruktura finansiero ekonómiko sano. E pueblo di Kòrsou a skohe pa un Kòrsou outónomo den Reino. Pa nos por logra un komienso eksitoso ku e garantia pa un futuro ku por brinda bienestar pa nos pueblo huntu ku e parti finansiero ku ta indispensabel, mester bin un kambio di mentalidat tambe. Nos mester siña konfia mas riba nos mes forsa pa nos stòp di dependé di ayudo di otronan i siña “para riba nos mes pia”. Si tin hopi hóben sin trabou, delinkuensia, pobresa i mal kontentu, esei lo hasi e proseso mas difísil. Konsiderando tur e “role model” nan internashonal ku nos hóbennan ta haña mira por ehèmpel na televishon, ku no semper ta positivo, nos di Fudsek ta haña ku nos tin di skohe i promové nos mes “role model” Yunan di Kòrsou. Na mes momentu tin hopi Yu di Kòrsou eksitoso. Ta lástima ku hopi hende no konosé nan, no sa kiko nan ta para pe i kon nan a logra éksito. Nan talento, komportashon i imágen por inspirá otro pa avansá meskos ku nan. No ta trata aki pa glorifiká nan persona òf nan prestashon, pero ta pa eksponé e forma ku nan a logra éksito komo ehèmpel pa asina inspirá, motivá i te hasta aktivá otronan. E resultado lo duna pueblo, lidernan, polítikonan i opinion públiko den henter Reino un imágen mas positivo di nos yunan di tera. Esaki ta duna nos hendenan mas outo-estima i krea mas konfiansa serka dunadónan di trabou.

Ken por ser nominá?
Tur hende por nominá o vota pa un persona, pero e nominádo mester ta Yu di Kòrsou. Pa nos organisashon “Yu di Kòrsou” ta tur hende ku sinti nan mes Yu di Kòrsou. Tur hende ku ta loyal I ta stima e pida baranka aki. No ta importa edat, sekso o religion. Tur ta bini na remarke. E kandidato mester ta sí fuente di inspirashon positivo pa nos komunidat. Lo no permití pa malusá e nominadonan pa motibunan no apropiá o usa e proyekto aki pa bo promoshon personal. Hinter e proseso ta bou di ouspisio di un notario. Kuminsamentu di 2008, mientras nos ta konstruí e websait pa votamentu, e proseso pa nominashon ta kuminsá. Esnan ku no tin akseso na internet por nominá o vota por eskrito.

Meta
Meta di e proyekto ta pa mustra mundu i, muy en espesial nos mes hóbennan kon nos héruenan Yu di Kòrsou a logra bira eksitoso, saliendo for di un situashon kisas similar na esun ku e hóben por ta aden aktualmente. Nos héruenan mes lo splika kon nan a deskubrí nan talento òf karakterístika, ki opstákulo nan a enkontrá, kon nan a vense esei i ken a yuda nan. Tambe nan lo splika ken tabata nan inspirashon, kon al final nan a bira eksitoso, ki konsekuensha esei tabatin pa nan bida i kiko ta nan mensahe pa nos hóbennan. E historia i mensahe di e 100 héruenan ku haña mas tantu voto lo ser kompilá den un buki speshal. Diskutiendo i lesando nan historia, lo inspirá nos hóbennan pa deskubrí nan propio talento i desaroyá esaki.

E proyekto aki ta ser lansa den kuadro di Nation Building, esta pa promove sentimiento patriotiko. Pa hasi nos hendenan mas orguyoso di nan propio Pais. Komo nos héruenan defuntu no por partisipá aktivamente den esaki, nos lo honra nan i demonstrá nos sintimentunan di orguyo pa ku nan, dor di dediká e “Buki Spesial” aki na nan!

Ken nos ta?
E proyekto aki ta ser organisa dor di fundashon Fudsek. Un fundashon pa informá i stimulá e desaroyo general di nos Yunan di Kòrsou pa medio di diferente tipo di proyekto.

Kon bo por partisipá?
Masha fásil: registrá akinan yenando bo nòmber. Despues bo ta risibí un mail ku bo mes kódigo ku kua bo por nominá i vota riba e sait aki. Votando bo tin chèns di gana premionan valioso! Registrá aki .