|
Ki ta e Reglanan?
|
E reglanan pa nominashon - E fase pa nominá ta kuminsá despues ku e Wepsait a ser lansá, riba un dia i ora di komienso i fin ku e hurado ta stipulá. En prinsipio nominashon ta terminá ora ku e promé buèlta di votashon kaba.
- E nominashonnan ta ser hasi via e Wepsait, i pa esnan ku no tin akseso na esaki, pa medio di un karta na redakshon di Korsou Tòp 100. Klik aki pa nos direkshon sea na Ulanda o na Korsou.
- Bo por nominá kuantu hende ku bo ke pa e Tòp 100, pero paga tinu: bo por vota pa máksimo 5 diferente persona! Tur hende na mundu, di tur nashonalidat, tin mag di nominá kuantu Yu di Kòrsou ku e ke.
- E persona ku bo ke nominá mester kumpli ku e Tòp 100 definishon di Yu di Kòrsou: Un Yu di Kòrsou ta kada hende ku orguyosamente ta sinti su mes Yu di Kòrsou den kurason i alma, sin importá edat, ni e lugá kaminda e la nase ni na unda e ta bibando aktualmente. Si bo no sa sigur ku esun ku bo ke nominá ta Yu di Kòrsou sigun nos definishon, bo tin di puntr’é promé.
- E persona ku bo ke nominá mester kumpli tambe ku e definishon di Tòp 100 di un “Inspirando” òf un “Modelo di Kondukta”: un persona ku ta ehersé un ròl ehemplar pa un grupo di hende, i pa medio di su prestashonnan, komportashon, karisma òf otro karakterístika ta inspirá, motivá òf asta aktivá otronan. E por ta un mama soltero ku a lanta su yunan ku éksito, òf un trahadó soshal ku ta empeñá pa hóbennan, pero tambe un polítiko konosí òf kantante por inspirá. Importante ta ku e persona aki no ta inspirá solamente abo, pero otronan tambe.
- Un nominado tin e derechi di retirá su nominashon, dor di manda un email pa info@curacaotop.com. Esaki lo ser kontrolá tumando kontakto ku e persona en kuestion.
- Ke mèn ku e persona ku bo nominá mester ta na bida na momentu di e nominashon.
- Bo mester motivá den mínimo 50 i máksimo 250 lèter dikon e persona ta un Inspirado no solamente pa abo, pero tambe pa otronan. Si bo motivashon no ta sufisiente nos lo tuma kontakto ku bo.
- Bo nomber tambe ta wordu menshona riba Wepsait bou di bo motivashon.
- Bo mester agregá un portrèt di e nominado na e Wepsait.
- Si e redakshon di Kòrsou Inpirativo Tòp 100, despues di konsulta ku e hurado i notario, disidí ku bo nominashon no ta kuadra ku normanan, e nominado aki lo no ser poné riba lista pa vota/Wepsait, i lo bo risibí un mensahe di esaki dentro di 1 siman.
E reglanan pa vota - Manera un persona a ser nominá i, despues di aprobashon di hurado, (mas òf ménos un dia despues), a ser poné riba e Wepsait, por vota riba e persona aki. Un persona por ser nominá un biaha so.
- Tur hende por vota riba maksimal 5 diferente nominado, aunke si bo a nominá mas ku 5 persona.
- Bo no tin mag di vota mas ku 1 biaha riba mesun persona.
- E promé buèlta di vota ta kuminsá despues ku e fase di nominá a start i ta kuminsá i kaba riba un fecha i ora ku e hurado ta stipulá. E promé buèlta di vota ta sosodé via di e Wepsait, i pa esnan ku no tin akseso na esaki, pa medio di un karta na redakshon di Korsou Tòp 100. Klik aki pa nos direkshon sea na Ulanda o na Korsou. E promé buèlta di vota ta dura en prinsipio mas òf ménos un luna.
- Tur nominado ku despues di e promé buèlta di vota ta den e Tòp 100, ta pasa over pa e di dos buèlta di vota. Na e promé buèlta di vota, si mas ku un kandidato tin mes tantu voto i pues ta riba mesun lugá den e Tòp 100, nan tur ta pasa pa e di dos buèlta di vota. Den e kaso ei, mas ku 100 nominado lo pasa pa e di dos buèlta di vota. Despues ku e promé buèlta di vota a kaba, e fase di nominá tambe ta terminá.
- E di dos buèlta di vota ta kuminsá despues ku e promé buèlta a terminá i ta kuminsá i kaba riba un fecha i ora ku hurado ta stipulá. E di dos buèlta di vota ta dura en prinsipio un dia i ta kaba den un Show na Televishon.
- E di dos buèlta di vota ta sosodé solamente via di SMS. Den e resultado final despues di e di dos buèlta aki, tin mag di tin solamente un persona riba kada lugá den e Tòp 100, aunke mas ku un nominado a risibí mes tantu voto, òf tabata tin mas ku 100 ku a pasa pa e di dos buèlta. Pa alkansá esaki, e sekuensia ku di a risibí e votonan lo determiná ken ta haña e lugá di mas haltu.
- Pero pa lugánan 1 te ku 10 esaki ta otro: si despues di e di dos buèlta di vota, tin mas persona ku mes tantu voto den Tòp 10, hurado lo disidí pa alargá e buèlta di vota ku un kantidat di minüt stipulá. Esaki por ser ripití, te ora tin un persona so riba kada lugá i niun hende no tin mes tantu voto den e Tòp 10. Si tin problema (tékniko) hurado bou di guia di notario, por disidí kon ta atendé.
- Di e Tòp 100 Yunan di Kòrsou mas Inspirativo, un buki di kolekshon speshal lo ser traha. E personanan lo bisa nan historia inspirativo den e buki aki.
- Di e Tòp 10 Yunan di Kòrsou mas Inspirativo, un dokumental di televishon speshal lo ser traha.
Reglanan general na e supervishon - E elekshon kompleto ta bou di supervishon di un notario i un hurado. Nan lo husga si e nominashonnan i elekshon ta pasa honesto.
- Si tin sospecho di froude òf maluso, hurado despues di konsultá ku notario, por disidí di saka un òf mas partisipante for di e elekshon.
- E notario ta hasi akto di e resultado di e promé buèlta i e resultado final.
|
| |
Lastu noticia
Nos sponsornan
|
